Ӄусԓнэӄу кԓэйвуӄзукнэк ӄиӽэ’ин и’иԓунк, к’энчхзуӄзуин нын әӈӄа и’иԓунк. 2. Кԓалэкнэн­кԓалэкнэн, к’ураткнэн, к’әљчкнэн и’иԓунк, љи ӄтаӄ к’йәлӄэӄзукнэн. 3. Эну’н ӄиӽэнк љи амӄ кзунԓзукнэ’н ӄиӽэ’ин ӈита’н, ч’оӄ златумхэ’н. 4. Итӽ љи ч’инәӈлаӽа’н кԓӄзукнэ’н, ккэнэзыкнэн итӽ ӈаԓхкэс. 5. А к’энк ӈаԓхкэс? 6. Љи амлаӽан ӄиӽэнк ӄа’м вимсхэ’н зунԓкаӄ. 7. Ккэнэзыкны’н итӽ ӈаԓхкэс сәмтэнк, к’эскнэ’н амлаӽал ӄиӽэнхал и’иԓунк. 8. Ԓэйвозы’н и’иԓунхал, к’әљчкуин тхин и’иԓунк ч’амзал йәлӄэзын. 9. Ӄнэӈ к’умныкны’н, кԓин тхин на кәнтхлакнын тхин ӄиӽэнк. 10. Хоӄэн ӽаӄ кт’әлаԓӄзукнын тхин ч’искинэ’н љи әна’н п’э’н вимсхэ’н. 11. Вонк итӽ к’әнтхлакнын тхин Ӄусԓнэӄу ӄиӽэнк. 12. К’әсхԓикнэн Ӄусԓнэӄу и әљчӄузнэн љи тэӈлаӽа’н ӈита’н ч’эснэн ԓаки. 13. Ӄусԓнэӄу љи пәлӄ водерэн к’нуаԓӄзукнэн, тэӈлаӽа’н ӈита’н љи ӄэчиӄ кԓәнну’ин тхин, Ӄусԓнэӄу ӄа’м ԓиӈилаӄ. 14. Ӄусԓнэӄу мэйим к’нукнэн и тэнаӄ к’йәлӄэӄзукнэн. 15. К’әсхԓикнэн љи пәлӄ иксхулызын. 16. А миԓ ч’оӄэ’н ӈита’н ксоӈкны’н тмалк әнанк и нәљчкузнэн әӈӄа на скааԓнэн, әӈӄа лаӄзааԓчиӈнын. 17. К’илаԓӄзукнэн Ӄусԓнэӄу љи пәлӄ. 18. К’әнтхэԓӄзукнэн нын самой плаӽ вимсх’ин п’эч: 19. – Љи тэӈлаӽ кәман п’эч, ӄа’та атнок, ӄэ’ну љи ӄэчиӄ икәнсԓин, миԓ чумана’н тӽнунэн и’эԓ. 20. К’узукнэн энчхзос и’, ӄа’м чкикаӄ. 21. Ӈита’н миԓ и’ ктоӈан тхин. 22. А Ӄусԓнэӄу љи пәлӄ к’илаԓӄзукнэн, к’әнзу’ин нын әнтхэԓки средной п’эч: 23. – П’эч кәман, ивлаӽа’н к’мә’н, ӄа’та кткнан, ктԓазокнан и тхәмтхалазнэ’н әна’н ивлаӽа’н к’мә’н. 24. ˚Касӽа’н ˚плаӽа’н ӈита’н кӽэныкнэ’н: 25. – Мзәлэн әнанк илкэс, йалӄ ӄа’т ӽаӄ нт’исэн әна’н ˚касӽа’н вимсх’и’н п’э’н чискинэ’н. 26. Ч’оӄа’ан ӈита кӽэныкнэн: 27. – Әӈки мкзоалак, вийаӄ ԓәӈилы, может ч’оӄа’ан п’эч вимсх’ин чискинэн. 28. Ӄусԓнэӄу эм икәсхулки тэйит ӄа’та к’исӽаԓӄзукнэн, к’әнзу’ин нын әнтхэԓки ч’оӄа’ан п’эч вимсх’ин: 29. – Т’исӽэскичэн, п’эч кәман уљуљаӽ, ӄэ’ну овэконԓ әљчкустэзнэн и’энк, зэрклачозын увик, љи ч’инәнӄ әљчкузнэн. 30. нэӈ ч’оӄ ӄиӽэа’н ӈита’н кԓәӈэлы’ин тхин дедючӽ, љи пәлӄ кԓэнну’ин тхин. 31. Ӄусԓнэӄу нэ’н ӄа’м йәлӄэӄаӄ кԓӄзукнэн, к’узукнэн атноӈ тайтаԓки. 32. Ӈита’н к’әлфчакны’н на атноӈ әнтхлакэс и әна’н п’э’н вимсх’и’н әљчкэс. 33. К’оч’ин тхин ӈәйуӈий, кԓаволкны’н ӈәйуӈэйанк, дедючӽ лэм к’әнԓаԓ’ан и ксхэзыкны’н атноӈ. 34. Атноӈ кк’оԓкнэ’н, дедючӽ ӈита’н кистэнк к’оч’ин нын. 35. Ӈита’н кч’экны’н кистэнк, и к’әљчку’ин тхин әна’н ч’оӄ п’э’н вимсх’и’н, и љи пәлӄ ӄнэӈ тӽэ’анк к’ӈаԓхаԓӄзукнэ’н. 36. К’узукнэ’н сватаԓки. 37. П’э’н вимсх’и’н нәљчкузнэ’н эну’н ӈита’н, мэнкэна’н итӽ љи ч’инәӈлаӽа’н ктлаӽа’н, ӄнэӈ к’әлфчакны’н. 38. Лаӽсӽ Ӄутӈэ кӽэныкнэн ӄамзананк: 39. – К’энк кза итӽ зәлызэ’н? Манк зунԓӄзааԓи’н ӄиӽэнк? 40. Ӄусԓнэӄу кӽэныкнэн: 41. – Заӄ ч’эхч’эԓ тәлхԓазокаӄ, кма хоӄэн тԓӄукичэн, ӈита’н љи ч’инәӈӄ зунсы’н, миԓ әӈӄа тхи’ин чискипнэн, љи к’иныкзуԓкнын и љи к’вэтаткнэ’н, мәзы’н п’э’н ч’инәӈӄ тхи’инк зунԓӄзааԓи’н. 42. Ӈита’н к’әнԓаԓ’а’н тхин ӈичэ’н ӈәйуӈэйанк, ксхэзыкнэ’н атноӈ. 43. К’узукнэ’н зунԓки. 44. Кзунԓӄзукны’н љи ч’инәӈӄ, ӄа’м ит’э ӽаӄэњԓкаӄ. 45. Ит’э лаччаӽ эсӄзузын, ит’э ԓаволӄзузын, ӈита’н ӈичэ’н нԓаволӈатэзнэн ӈәйуӈэйанк к’аачанк, узуатэзын йэздэԓки ӄиӽэнк. 46. И ит’э итӽ йэздэԓӄзукны’н ӄиӽэнк, љи ч’инәӈлаӽ завина скататэзын ӄэсхчӽанк.