Розка вэнекоми' нянан ханесеты. Маниеба”н, тарем’ ядэро”манда пуд ха”лита хане пяда.  Нявако”омна-тэвасико”омна сабе мел”мана хане туху. Ңоб” мэва’ мерета тэвасиком’ нёдась. Ханесэда ңэсы’ варувна яха’ няю санарңа. Ян тикарихина пыри-сяторэй няндаси няңгрё ныланавы. Ңэвая”да я’ вархана ңа, индтамда нэкалпи. Ябцо”яда ңани‘ ид’ ңылна тэри лехэбты. Тэвасикоця”е ихинянда нив ман’: «Ехэй! Ювэй! Няна’ сава лыңгдув хом’!» Лакри’ санэй”. Розкав ңо’ мер’-мерливна пумнанда сакада. Халя’ нянко’ мюня сэйцаха’. Вэнекоцяев хунбада тэвасимда пыри-сяторэй’ едю” поңгана хо”нидав, ня”ам нидав, тибяхат нидя ңэдарамбю”. Сяторэй’ хэвдым’ си”а, тэвасико”ем’ нян тэврада. Тикы пыри-сяторэйм’ хардан ңэсонд’ ңодьри” тэврава”. Ңацекын, перенин, хибя танеда мал’ нядаңгуць. Тёрсавэй, тяхасавэй’ ңодь” тэврава”. Хундада ямбэй, ямбакоков! Ңэвада танцян хэвхана ңа, ябцода яхана ңа. Тусада я’ нивня лехэбты. Ти, хурка”е ңарка”я, сюдбя халя ңэвы. Тикы пыри-сяторэйко”ям’ наңэдя няхар” по’ ямбан ңаворңаваць. Март мир”ңэ самляңг бочкандер” сэратавэңэ тэвраманзь. Теда’ стол’ ниня ңарка”я реска’ мюня мандакэн ненэй халя ңэдакы. Ниңэй! Ңобтикы Розкан ня”амвы пыри-сяторэй ңа”нив. Валакада халява” техари’ сэратавы ңэвы. Сер” яңгу! Ңаво”рамахад хуняцей ңокаркавна сяйндан. Самовар”ма” ңарка, сидя неранзь’ и” нялта. И” хахаи, харта тута! Сяңокувна харван, таңокувна идар”. Розкан сяторэйком’ ңаво”ромахад яля’ ямбан’ сяйма мян. Сяйкор хайнаңгу, малеванд ңэсонд’ ңэрор”. Ти, хурка ханей вэнеков таня! Харваб”нанд пунрю”, харваб”нанд нён. Маня” тарем’ илева”!