Яв’ вархана лабтэйко ңа. Яв’ маравна тямдэ” сантырңа. Лабтэйкон’ мацеда. Лабтэйкон’ тойтырңа. — Хибя лабтэйко’ мюня иле? — Мань халякодм’, пыдар хибян? — Мань тямдэ”кодм’. Ңобкана илехэней! – Ңэёв! Ңобкана илехэней. Хов, ңобтикы маравна писяко варна. Лабтэйкон’ тойты, юнра: — Хибя лабтэйко’ мюня иле? — Мань тямдэ”кодм’, пыдар хибян? — Писякодм’. Ңобкана илехэней! — Ңэёв, ңобкана илехэвов”. Ти няхар”ңэ илелъяд”: халяко, тямдэ”ко, писяко. Хов, ханяд ңэбта ңо” лабтэйко’ хэван’ пияко тоса то. Лабтэйкон’ тоса тоебты. — Хибя лабтэйко’ мюня иле? — Мань писякодм’. Пыдар хибян? — Мань пиякодм’. Ңобкана илехэвов”! — Ңэёв, илехэвов”. Ти, халяко, тямдэ”, писяко, пияко ңобкана иле пядо’. Хов, яв’ марахана нохоко ңадимя. Лабтэйкон’ тэвы’, тойтырңа. — Тюку лабтэйко’ мюня хибя иле? — Мань пиякодм’. Пыдар хибян? — Мань нохокодм’. Ңобкана илехэвов”! — Ңэёв, илехэвов”. Ти, лабтэйко’ мюня халяко, тямдэ”ко, писяко, писяко, нохоко самляңгңэсь ңобкана иле”. Хов, яв’ варувна тёняко нихыры. Лабтэйкон’ тэвы”. Лабтэйком’ тоебта. — Хибя лабтэйко’ мюня иле? — Мань нохокодм’. Пыдар хибян? — Мань тёнякодм’. Ңобкана илехэвов”! Ти, халяко, тямдэко, писяко, пияко, нохоко, тёняко ңобкана иле пядо’. Хов, яв’ варувна сармикэця халмана. Лабтэйкон’ тэвы”. Сава” ңабто лабтэйкоход миңа”. Лабтэйкон’ тоерңа. — Хибя лабтэйко’ мюня иле? — Мань тёнякодм’. Пыдар ңань” хибян? — Мань сармикэцядм’, тэва ямбком’. Ңобкана илехэвов”! — Ңэёв, ңобкана илехэвов”. Сармикар няндаси няңгрё лабтэйко’ мю’ тюңгута пяда. Тарцям’ манэкава халяко тямдэко’ ня’ ит’ мулкадаңаха’. Писяко я’ ваңган’ сакада. Пияко вано’ ңыл’ вэхэда. Нохоко пэ ваңган’ лыңгарэй”. Тёняко ңобтарем’ ваңготан’ мирна сакада. Сармикар ңань” тюку тендад” ңавраңэ пэрмыда нёраку”ңа. Ти, та малда. Сямяндхат сава саля Сямянхат сава саля — Нельмин Саля. Пирця хой’ ниня, Печора’ хэвхана Ңэсыкоцяв ну, ңахат ңади. Ңамгэ’ е”эмня си”ми хаңан? Ңамгэ’ е”эмня я’ ниня танян? Ява” ёльце паской… Яха”, то”, саундей”… Выңгана ңодя” сацей ңоков”: Лынзермя”, варңга”, Енздей”, мараңга”. Ңэрмэй явэй, ситэй мэнемэй! Саляхана ёльце савов”, Хибяри” cёнзядо’ сацей латов”. Ситэй сейхад мядолабтаңгу”. Хусувэй мядондам’ таслаңгува”. Пыдар хибянэй, пыдар хурканэй? Ңамгэ’ е”эмня маня” ян’ тонэй? Ңамгэ’ е”эмня пыдар иленэй? Сава сёнзясавэй ня”на” тонэй? Нельмин Саля ңэсыко е”эмня Сёв хыно”ңая, Сэр” хохорэйңэ cёнзяв’нянд миңая, Нерня миңая.