– Өс ҷу сөӽ юӽнат войәӽнам йăӈӄиԓмаԓнә Лӱк Ԓяктә Ики пәԓтә вӓр пә әйнам әнтә тўй? – Микуль аҷиԓ пырипәӽ. – Сөӽ юӽнат пәԓпәса нөмԓәмтәтә ким әнтәм. Ницәҷу кӱт ваннә пәтан ԓӱӽ сөӽ юӽнат пупи кәнц. Ӄөԓиԓэ, вөнтнә төп пупии яӽ пәԓԓәт. Төп әй войәӽи. Яӽнә ҷу вӓр пәтан пәԓԓи, ӄыәм пыр ырап ырап войәӽ, өнтәԓ йәмат ван. Яӽнә йимәӈ панә ҷәрттә войәккә төйԓи. Па ԓатнә йәм ўнтәп, па ԓатнә атәм ўнтәп. Па ԓатнә ҷуминт вӓр вӓрәԓ - ăԓә ӄөԓԓәӽ йәԓи. Ар урәԓнат ӄăнтәк ӄөнам кирәӽԓәтә вӓр төяԓ. – Ма саӽетпамнәя, нөмәснат кацәӈ вӓр вуй. И пупи нөмәснат тўӈәмтәӽ. Ԓӱваты цопәӈӄа войә– нӓриптә таӽи мус. Нюԓ йицаԓта таӽи: ӄөяӽи нөӄпи питәԓ, ӄөяӽи әнтә ӄăньҷәкинтәԓ. Ӄөяӽи иԓнам пөнәмтәԓ. Вот ҷи вӓр ԓӱваты мус. Ицәк вәԓэ, мўв арeт пупи выӽәԓтәӽәԓ, а ҷи войәӽ ҷакәр – мәтаԓи тăвәԓҷәтә вӓр әнтә тўй. Әй пул пә ԓуԓәԓа әнтә вәйәӽ. Төп ӄөтнә- ӄөтнә пупи ԓөԓәӈнә кевәртәм нянь ҷут ԓивиԓә. – Йәмат сәмәӈ ӄө төп сӓмты сөӽ юӽ вәԓ? – Ӱрәккә мăвәԓӽә сәмәӈкә вўԓ. Пәԓмаԓ ўт әнтэм вўԓ. Әймәтԓи пә пырӽи ԓьоԓьҷә вӓр әнтә тўй. Ицәк войәк – ӄуԓ кәнцә яӽ ԓ–ватынам ԓэйәԓмин па ԓатнә сәмԓаԓ атәмӽә йәԓәт. Вот ҷуминт вўԓ нӱӈ Лӱк Ԓяктә Ики ҷетҷеҷе. Ԓӱв пырәԓнә ит, яӽ ясӈәт саӽет, өc ҷуминт войәк кәнцә ӄө әнтэм вўԓ…