Гыммо тыкуюнэтыӈ Камчаткак мэтг՚анымнымык В՚эемлэн. Гымнин нымнынм котваӈ айгытӄытэйкыялӄэвынвык аӈӄагэӈкы нотаг՚эӈыткынык. В՚эемлэк коёналлаӈ нымылг՚у. Нымнымык котвалаӈ ӈыяӄ ыстов՚ ынаннмыллыӈэн мынгытык ӈыяӄмыллыӈэн г՚уемтэв՚илг՚у. Мыкъянво -пенсионеро то кмиӈу, туймэйӈэтылг՚у г՚опта кытвыль. Эейвэӄ нымнымык амкыка уйӈэ авэтаткылг՚энав՚. В՚утку г՚уемтэв՚илг՚у котагыйнэӈлаӈ, конныӈэйтылаӈ, нэкуйичиӈнэв՚ тыӈэчг՚у. Г՚оляв՚ котагыйнэӈлаӈ кайӈык, кытэпак, мэмылык, калилг՚ык. Лыӄлэӈкы кытгымык, яёлак, имйыӄчукак, рысяк, ӄэпэйык, ӈэньӈэтык, милютэк, ев՚ъевык. Гыйникналгу тагыйниӈылг՚а нэкуйылӈынэв՚. Ӈывогыйӈык анок мыткуг՚эньӈынэв՚ г՚итув՚, галгав՚, г՚ам ӈэйӈэйык г՚опта мыткугитэӈнэв՚ йиӈэлг՚у омнотайтыӈ. Г՚опта анок мыткочоччымав՚лаӈ тайӈатынвэтыӈ в՚этэӈ, ею котакъялаӈ эв՚тылайтыӈ в՚аямгыпыӈ. Нэкэкминьӈынэв՚ чинин тэйкылг՚у эег՚унэӈу. Ыннин в՚этв՚этӈыйтыгыйӈын китыӈ чаймыӈ анойтыӈ, ӈывогыйӈык тэнмыталойыг՚элгык то кытаван ӈывоӈвок алайыг՚элгын. В՚утку ымыӈ юнэтылг՚у нымнымык В՚эемлэк копыттоӈав՚лаӈ в՚итв՚итэ. Ӈывогыйӈык алак г՚уемтэв՚илг՚у кыг՚аӄав՚лаӈ аӈӄатайнэтыӈ, тит гэӈынтыватык оӄынчаӈ, альпэӈ то гэтгэӈ. Мытконмыӈӈав՚ ынну, тит эв՚йик лыӄлэӈкы. Јэвэӄ йитыӈ мыягыйӈын, тагыйниӈылг՚а наконмыӈнав՚ мэмыло гаймат калилг՚у, титэ ыччу в՚ача коялгыллаӈ аӈӄагыйнэпыӈ. Јаен, микынэк конмыӈнэн мэмыл, ӈаен куейвитэвыӈ тумгык. Алак, титэ куелӄивыӈ ынныын в՚аямыӈ В՚аямлаӈ- ымыӈ колалаӈ в՚аямтайнэтыӈ ынныӈыйтынвыӈ. Г՚уемтэв՚илг՚у тэӄын тагаё ковэталлаӈ ынныӈыйтынвык, уйӈэ эткив՚кэ яяк. Ынну мыткочёляӈнав՚ лыӄлаӈыӈ, мытконыпг՚ав՚ӈынав՚, ынанӈынвычгая нэкунв՚ичев՚ӈынэв՚. Вэтатылг՚а нэкунныньӈэв՚ӈынэв՚ картошкав՚, капустав՚ то эмыяӄмыльмылё. Нэкунумэкэв՚ӈын тыттэль ныпыттоӈӄэн урожай. Алак эльг՚ав՚ омакаӈ кочоччымав՚лаӈ иччетык еченвыӈ энанмалав՚выг՚аю, ывынг՚у, ӄычвоныкло, пыг՚онав՚. В՚эемлэк котваӈ нэӈинмыӄин пэнин ангыт «Ололо». Китыӈ в՚уччин ангыт, титэ когалаӈ тагыйнэӈгыйӈын. В՚уччин пэнин мучгин ангыт когалаӈ ынпычг՚ык этынвылг՚ык яяк. Эльг՚ата накончоччымав՚ӈын тилкытил то куччев՚ пэнинэв՚ пичгу. В՚отӄыайгывэньӈа ӈав՚этынвылг՚ын омакаӈ колэнэльг՚айык омакаӈ кэналваллаӈ мэлгэтыӈ. Г՚опта нэкуччилӈын мэлгэтыӈ выг՚ай «Лыг՚утэн» то накотывыӈнав՚ гыйнику, накотымывыӈнав՚ тагыйниӈылг՚у, г՚опта накотывыӈнав՚ нынну, микынэк ганмылын кытэп, кайныӈ гаймат калилгын тит ӄулин гыйнику гымлэ ныяйтыӈав. Ныкиняку йыӄмэтэвэтыӈ ымыӈ комлав՚лаӈ чав՚чывачг՚энаӈ, коӄолэявлаӈ.  Гайпылэн пэӈӄэ кокоӈ этынвылг՚а конятвыӈнэн «Уттыут мъяйгыйӈын». Гэйӄэйиг՚этэ кукумнатыӈ «Оло-ло! Оло-ло!» Имымэки кутгыматыӈ инэнник уттык. Уттыут, гэйӄинилутэ то нэкутыӈуӈын ялкойтыӈ, нэкуччилӈын мичгытайнык. То еӄӄэ ымыӈ кокамакъяллаӈ гылнэкычг՚энаӈ. Йыкмитив՚ камачыко нэкучилӈнэв՚ пичгу кайныӈ, кытэпаӈ и калэлг՚эӈ, гэйкэмимылэ то ныкуччилӈыл мичгытайнык. Јав՚этынвылг՚ын кивыӈ г՚ыйнэкыӈ, тит ийкыӈ пытыӈ нымэлкиӈ йыг՚эт то яйтыгыйӈын. Эчгатык «Уттыут мъяйгыйӈын» нэкунэӈ. Ыньӈыг՚анкуӈ когалаӈ пэннин ангыт. Гымнин нымным ӄэйныппулюӄин то ыявак котваӈ, эв՚ыӈьчам ыманмэтг՚ачг՚ынван, минки мэтг՚аӈ эмолкэ паӈавйийык.