Айӈон юнэти Куйкыняку, В’эллы то Яел. Куйкыняку кивыј В’алвынај: «Такал, мынэег’улӄив’мык в’аямэтыј». Ӄыллай ыччу аяг’онвэтыј, выг’аёк винвык нэлыг’ун яел куйылтэлыӈ. Ынпыќлавола кив’ӈынин В’эллы: «Колё-мэй, памъялӄы лыӈйитыӈ гымкыӈ». Чачамэнак гымкын етэйкыӈнин яёлпамьят. Ӄаплонен яёл, тэӄын ӄок в’йинван гэвиг’ылин. Эмтэйпынэн яел то ӄыти в’аямэтыӈ, г’ам яёл малета пылгы ятэгыт каӈыгпы ӄлаволыӈ, тэӄын гэвиг’ылин, ынно мыев’ тыттэль нытэмьюӈӄин. Пыкэйлай в’аямэтыӈ Куйкыняӄу кивыӈ В’алвыӈ: «Яво, Такал, мыччилын яёл ӈанко йыв’игыӈкы то мынэег’умык, то ӈанӄо мынэкмит».Ӄыллай ыччу в’аямэтыӈ ынныӈыйтык, нанмынав’ г’ам амкыко ынну -Мычаяклаӈ? Еӄин ынну мыччаняйтаньӈынав’? – кивыӈКуйкыняӄу. - Ӄычвитку ӈынвыӄ йыллу, Ӄытэйкыгын уттыуетикпиль.- кивыӈ Вэллы. - Еӄин-г’ам мыччаг’аг’алаӈын? - Мыег’эйӈэв’нэв’ гымнин кмиӈу, ычгынанна яв’энняламык- кивыӈ В’эллы. Куйкынякынак тэйкынин уттыуетикпиль, гэччилинэв’ ӈакые ынну то г’оптаяёл. В’элвэӈыёӈ г’эйӈэв’нин: «Мэччу гымнин кмиӈу,в’иннетычг’у, ќыяллаток ӄойыӈ, ӄэнав’эннялатык г’аг’ак ыннивыгымынну,йыяйтатык» Яллай ынин мыллыӈэн мэйӈыв’элву, кылганэн’ то наг’аг’анав’ ынну гайӄыяела. Накуг’аг’аӈнав’ ынну, явалэйтыӈ уйӈэ алляпка кэллаӈ. Г’ам яелачга гаӈволэнав’ юкккы ынну, то ӈывонэн малэёчга йинлык вэнвэтыӈ. Тэкъей то яӄомгынтэви.Вутӄытвик яйтылай, Куйкынякынак гэг’эйӈэв’лин Мити: - Мэй Мити ӄынатвыгынав’ынну то яелпамъялӄыл. Ялӄэв’лай Куйкыняку то Вэллы , то Мити инг’эӈытой, гитэнин г’ам ӈанко уйӈэ йынны яӄ ынну, яӄ яёл… Ӈывой кумӈычийык ынпыӄлаволынаӈ. - Мэй ынпыллавол, еӄу-г’ам ӈывой гымкыӈ тинмэтик, уйӈэ ӈанко атвака ынну, яел. Кукынякынак кивыӈ. - Вутӄычику ӈанко, аму уйӈэ элэг’укэ кунтыӈнэв’. Митинак кив’ӈынин. - Чинин ӄыгитэлӄив’, ятанйыллу, яќынну то яӄяел. Куйкыняку кивыӈ. - Яёлачгыняво.. Йыӄимтив’ чоччымав’лай Куйкыняку то Вэллы, титэ наейыктэнмы Яел, Г’аӄав’лай в’энвэпыӈ, миӈки г’аг’алай уттыуетикпилэӄэ. Пыкэйлай в’аямэтыӈ, нэлэг’ун, малеёчга г’эгылӈын кулэӈняелаӈ. Г’эгылӈын кивыӈ яелаӈ: - Чакок, миӈки тымнав’ ӈынвыӄ ынну? -В’эемык тынмынав’. -Гымнан мэтке ынну тыянмыӈӈав’? -Ӈанко Куйкынякынак пэланэн эегунэӈ, кэег’угичинин. -Чакокпель в’алю г’ам ыннен ынныпиль кынэйыл гымкыӈ, тыкугытгэтыӈ. - Ӄыём мыйылги, чинин ӄэег’уйки. Ӄыти г’эгылӈын в’аямэтыӈ то ӈывой эег’ук, уйӈэ энныӈыйтикэ итти. Г’эгылӈыӈ пыкийгыг’и Куйыкыняку то Вэллы. - Г’амто такал. -Г’амтоКуйкыняку. -Уйӈэ аннынматка? -Уйӈэ анныматка, яёлэн ынну тыв’аӈланав’, ынан уйӈэ эйылкэ гымкыј, амкыко ынык котвалаӈ. - Гэйгулэлин, миӈки яел куюнэтыӈ? Пыкэйляй в’анвэтыӈ, яел атаваломнэнычгинэв’ кумӈу, гатэнмытыг’ыл ӈыволэн, кивыӈ - Куйкыняӄу куеӄыӈ, гыммо унмык тыкутг’ылыӈ. - Амин айгывэви’и, гымнан имтитэ…. То г’амынныкатын г’элык. - Мэй уйӈэ гымнан …. Куйкыняӄунак, В’элвэ то Г’эгылӈа йыв’аӈанма тилытил, яелгынтэви . Нэкмитын чеючгынычгынан то кыллай яйтэтыӈ. Вутӄытвик яйтылай. Ынпыӄлавол кукумӈычийыӈ чачамэнаӈ. - Мити в’ото чеючгычгын ыннин мытъетын. Мити ӈытой,ӄэйлы-кун чеючгынын нагэйычг’элин. Ӄамэтваннэн Мити накынна ямкылг’у, то гэйиг’элинэв’ яйтылайыччу. Г’ам Куйкыняку то Мити омакаӈ куюн.