Ыньненьчен тыкулэн гыммо нотайпыӈ то кытавут тываломын аму яӄ кумӈыкум то пычгычгын. Пыльльм, гыммо метг̓аӈ тыкойеёлӈынав̓ гыйныку то пчикав̓. Тыӈвон энаейык, ына яӄ пычгычгын тыковаломӈын. То тылэг̓ун, ильгыльӄык умекеты ымоӈ нутэкин нымыйычг̓ын: гыйныку, пчиӄав то амалваӈ итылг̓у ынгэму. Ӄычын нэтэйкын майӈы-умекет, миӈки ычгынан накотанветгыӈын миӈкыйе яйтаӈо лыӈык нутэкин юнэт. Инэльлечг̓о ӈанко гыллын льги эчгы-четькэюӈылг̓ын Кайӈын, кувыньнетыӈ ынкыӈ Яёчаӈав̓. Гэӈыяйнан ыйык гатвагалэнав̓ Кояӈа, Кытэп, Кытгым, Ӈэньӈэт, Тылмытыл то Имйыӄчук. Ымыӈ гийныку то пчиӄав̓ ков̓аняв̓чейлаӈ, увикив̓ эчеӄмел накояпечайвыӈын, ипа унмык котгымалаӈ митылг̓у кумӈычийык в̓эллу. Выг̓аёк юнтымев̓нын ыччу инэльлечг̓а. - Мучгин юнэтгинын, тумгытую, кав̓ъяй алвайтоооӈ. Ӈычеӄ-гытькалг̓ын тумгын, ӄайтакалӈын-г̓уйемтэвилг̓ын, ӈынвыӄ йинны гэнкев̓йив̓лын. Актыка эмеч альг̓альк мучгин чинынкин нутэнут. Гаӄочгыйвылэн ынно майӈы-машината. Тыкивыӈ, мынпаломтэлын, йинны мойкыӈ йевлаӈ Кояӈа, Тылмытыл то Ӈэньӈэт. Унмык пав̓чиӈу тыччын гуччин ычгин кычвельг̓атгиӈын, лыган тычеймевык то тытвагалык паломтэлык. Уйӈэ мекнак гыммо эмеч альгалька. Кытавут кумӈыкумнаӄо мытваломын Тылмытылын. Метг̓ан ныволай г̓эйнэк ӄоянаӄо. То гам Ӈэнӈэтнэӄо иви: - Тумгытую, муйык нутэк юнэтылг̓у! Ӄыгэталатькэ мучгинэв̓ в̓эему, эӄӄэмло. Гамга ынки чеймык в̓эемык то эв̓чычайтыӈ ӈыччек-гытькалг̓ын г̓уемтэвилгын яялво гантывалэнав̓, то элвелгынэв̓ тагыйныӈылг̓ычг̓энав̓, г̓атав̓ чинынкинэв̓ яяпеляӄо гантывалэнав̓! Ӈайӄылвын муйык в̓эемык то в̓аямтайнык! Нэкунеӈчитькунэв̓ бутылкав̓, консервав̓ то ватӄэн амалваӈ итылг̓ын ӈайӄын! Тэг̓ы муйык яв̓в̓ачалг̓о! Ныючгыӄынэв̓ ӈэнӈэтпеляӄо ӄыньг̓ат кояв̓в̓ачаллаӈ, гытькапеляӄо ичвы-стеклак нэкуччыӈнэв̓! Вэемкинэв̓ пыӈотько накомалтактыӈнав̓ пылв̓ытны-гигынгиӈа! Ӄыньг̓ат тэг̓ы ынныпиляӄу когалаӈ ченэн-в̓анветыӈ, миӈки накойтоӈын лэлӈын. Мучгин льги-ынныын ӄыньгат ымоӈ нэкутькуӈын, нэкунмытькуӈын! Ятан лэлӈын гаймо нэкулӈынын, то гам яйвачгиӈын ынныпиль нэкунеӈчитькуӈын в̓эемыӈ, выгаёк в̓аямтайнык коӈвон в̓эльтькок, ынгэметык. - Эээ, ӄэйле, кэв̓в̓а ёнатгинын ныг̓элы, - иви майӈы-Кайӈын. - Гото ӄун мучгинэв̓ ӄояв̓ яӈыяӈыӈ коӄлалаӈ. Мынпаломтэлнав̓ ӄояв̓. - Ӄыгыт ӄун, ӈыччек-гытькалго тумгу накоянтоӈвав̓ӈын муйык нючельӄык тапичгыӈкинэв̓ нутэву, ятан наконпаччав̓ӈынав̓ мучгинэв̓ ав̓ыйенво, накоӄочгыйвыӈын мучгин нючельӄын миӈки янот яӈяӈнаӄо гыллынэв̓. Метькэ тэг̓ы кинуӈи мочгынан ыйкын мытькуйылӈын? То г̓ам ӄыгэталагытькэ ывынг̓ыпильляӄу: нэкучеӈчитькуӈын, еппы итытьӄэлг̓ын, эвын накоӄочгойвыӈын г̓оты-мынга. Аму ӄун ятан увикиӈ куюнэтыӈ, то янотыӈ уйӈэ эчетькэюӈкэ, йинны этг̓у йенӈэйки муйык нючельӄык, йинны япаёчавыӈ... Мучгинэв̓ кмиӈыпильляӄу ӄыйм ӄыньг̓ат нлыг̓унэв̓ меӈинет тыттэль ныпыттоӈӄэн янот гыллын мучгин нутэнут. Гыммо тыттэль тыӈийкылатык, колё ыньньг̓ан накотвыламык, пыльльм эв̓ынчам тылӄутык то тывык: - Тумгытую, нутэкин ваят! Тую нымелӄынэтую этынвылг̓о. Тыттэль аӈийкылка валомык тучгин в̓аняв̓, мыев̓ г̓уемтэвилг̓у тойкыӈ ӄэйле тыттэль эняччылай. Инмы ван мытынтоӈвавын Йыччы калыкал, мыттэйкынэв̓ тойкыӈ нючельку, тыт тую ӈанко метг̓аӈ ӄыёналатык, тыт кытыл мекнак тую ӈанко эйеӄыкэ. Йинны гутку тываломын то тылэгун, тыятвыӈын метг̓аӈ ваятыӈ. Тыкивыӈ, амыйел мычатгыматыӈ метг̓аӈ омакаӈ еюнэньӈык. Ымоӈ гыйныку пычикав̓ то ынгэму аӈыйялай. Гутку нутэкин умекет пыльтькуй, гыммо ван тыйыкчавык тывык гуччин тойкын.