Чав’чываелык котваӈ в’аняв’ «Макалг’ын». Ӈаен кмиӈыпиль ӄайыкмиӈын, ӈавытӄатпиль, микыйык накояваӈын мака кэйкэйык, кытаван ыннанмыллыӈэн гэвэӈ. Г’ам ӈанӄо ӄайыкмиӈыйык накояваӈнат ӄонайтэ, ичг’ын, г’ам ӈавытӄатпилляӄа ӈав’кэй, ичг’ын. Этог’ылв’ый кмиӈин чав’чывайык нэкутилиӈын ыннэӈчеӈ ёнанма. Ынно нэкунӄэвив’ӈын ӄоята, ӄэвийычг’э (мынгаӄчава, налга). Еӄин тэнынныӈык тойэтолг’ын? Нынну г’уемтэв’илг’ин-юнэтчвипыт ваятэн. Чав’чывачгэн ӄонпыӈ гиллинэв’ чининкинэв’ нынну. Эчги ыччу ныг’аллай Фамилияно. Нынныэнаейгыйӈын кэв’лаӈ, куетыӈ эмэн ныннэ уйийит виг’ыӄайтумгин. Нынны накэнаейӈын ыньӈыг’ан: 1) аняпэль – (ӈыёӄгыткатэв’епэль, гынунык ӈилӈык ганннепалэн в’ыв’выпэль гэннилин налгыпэляӄык), чачамъя наконв’анявав’ӈын тойэтолг’ын: мэӈӄо етти, гэйӄыеӄэ етти; 2) етылагыйӈа нанӄыльг’эн; 3) ӈэвэӄ кмиӈыпиль, эмэн гэтэнынныӈлин, юлэӄ унмык кутг’ылыӈ, чачамъя нэкуйылӈын ӈыеӄэв’кин нынны. Ӈыеӄэв’кин нынны омакаӈ накояваӈын янотныннык. Ӄэй яӄв’аняв’, йыллыг’ын нынну, накоӈвоӈын явак. Энангыёлав’гыйӈын яйычг’ык, ӈаен инг’э йымитытватык кмиӈын вэтатык. Инмы тыттэль ниччыӄин, ӄайлым ыньӈыг’ан накончоччымав’ӈынав’ кмиӈу вэтатык ӄэялгынотак. В’уччин этгыйӈын коӈвоӈ ӈанко, епп нанӄыльг’ыма. Эльг’аӈ, нанӄыльг’ыӈ накэв’ӈывоӈын-мэтг’аӈ гатваӈвота, аӈотычг’атка, мэтг’аӈ гагэтаӈвота нутэнут, г’уемтэв’илг’у, гыйнику, мычг’ав’, мылмылё. Кэв’ӈыволаӈ, куеӄыӈ нанӄыльг’ыма эльга: коӈотычг’атыӈ, качачгатыӈ-ыньӈыг’ан валг’ын ятоӈватыӈ ӈаен. Ыпполёӈко эньпичив’ котгымаллаӈ, тит ӄулинкин кмиӈын нитын ныкытгэмӄэн, нувик нулвыӄин. Ӈэвэӄ г’атав’ котэй- ӈатыӈ кмиӈыпиль, уйӈэ яӄам инг’э экмиткэ, тит акав’ка. Ӄытыл г’опта янот еӄӄым номг’ав’ анкэмэтг’апыка, тит акав’ка. В’ача, ӈэвэӄ уйӈэ аӄэялгатка ёёчыко, накэначг’эӈын ятан нанӄын то пончатӄын. То еван чинин ёнатгыйӈа кунгыйивэнӈынин, тит кмиӈа вэтга нанкылнин кинуӈи. Киткит накойтоӈын, йыкиӈын накэнайкэчэньӈын ачг’ытг’ула. В’утку ынно коловыӈ, г’ам соскано китыӈ кинуӈватг’ул, ачг’ытг’ул. Ӈыччеӄгивилг’ын кмиӈыпиль наконв’анявав’ӈын тэӄын ынпыг’уемтэв’илг’ын, ӄэй уйӈэ ав’аняваткылг’эн, эв’ынчам ӄэв’лаӈ кумитытвиӈ ыньӈыг’ан. Тит ниналкылики, ынно котваӈ яйычг’ык. Накунмитытваньӈын чинин имыеӄык. Ӈэвэӄ гайматылг’ын яӄам накунмитытваньӈын вэтатык имыекэ. Ӈэвэӄ ӈавытӄатпилляӄа экминнин титиӈэ гайӄыйыччыта, уйӈэ энэв’нака, вэтга нэкунгыйивэньӈын. Г’опта ӄайыкмиӈын киткит коӈвоӈ в’эйчитык, йийитык наконнепаньӈын ичвыкылг’ин в’ала. Эмэн ынно омакаӈ валг’ын ынпыг’уемтэв’илг’ык. Кмиӈыпиль уйӈэ анг’отав’ка в’иннетылг ’ы аньпэчеӈ. Уйӈэ анӄэг’ав’ка ӈавакык лыляпылг’ын инэв’эньӈэтык ыл лыг’ык. Эльг’ав’ коег’аньӈыволаӈ. Г’ам ӈэвэӄ энав’аньӈанма алвайтыӈ «кув’иннетыӈ» уйӈэ акытг’айӈака, накаӈъяӈын. Ыньӈыг’ан кмиӈыпиль кумитытвиӈ. Ӈыёӄ-ӈыяӄ гэвэӈ кмиӈыпиль кув’иннетыӈ милгуйик, каймыӈ, коммачайпыӈ уттык, коӄаман- мытатыӈ, куӈайӄытватыӈ. В’утку накунмитытваньӈын вэтатык яяк. Ӈыяӄ гивилг’ын нэкив’ӈын йынны янг’ав’ тэйкык. Нэкуйылӈынэв’ вэтатэнаӈо. Ӈавытӄатпилляӄин котваӈ в’аӈэчаёчгын: титиӈэ, йыччыто вэлывэл, ӄайыкмиӈин-в’ала, чав’ат. То еван кмиӈыпиль накунмитытваньӈын мэтг’аӈ гитэк ынпычг’у, ынпыӄлаволо. Ӄыгит, ялӄэв’ма ялькочыкойтыӈ энаяйтыӈ, эньпичийык накунмитытваньӈын, оттыоммачайпык мэлгыӈ; кытыл эмэв’йичвын эелӄив’кэ, гакомӈаньӈывота, тит анчаӈэтав’ка тумгу. Мыллыӈэн-ыннанмыллыӈэн гэвэгыйӈыӈ эмэт мэйӈэти в’энняттомгын. Ӈавытӄатпиль кув’иннетыӈ яяк ыллыг’ыӈ, ӄайыкмиӈын-аньпэчег’ тэминьӈэтык, йыюк, ӄояӈтак. Кмиӈын наков’аӈлаӈын милгэтык, чайпатык, ӄамэтвак. Ӈыяӄмыллыӈӄав’кэн гивилг’ын-эмэт чинин нимыеӄылг’этӄин г’уемтэв’илг’ын. Ӈавытӄатпиль кинэв’эньӈэтыӈ,ӈанӄо накунмитытваньӈын. Ӄайыкмиӈын чинин коӄояӈтаӈ. Ыннанмыллыӈэн гивив’-ӈаен мэки наконлыгэмэтытваньӈын имы-еӄык ӄылаволвэтатык, эльг’авэтатык.